☜ تجربتي مع قوالب تبييض الأسنان المنزلية
-
أسعد الله أوقاتكم و شكراً لعودتكم من جديد
تدوينة هذا الأسبوع خفيفه، عن موضوع يهم الكثير وهو تبييض الأسنان و كيف نحافظ على بياضها لفتره أطول.
لأني جربت الكثير من المنتجات اللي تهتم ببياض و نظافة الأسنان، هنا راح ألخص لكم تجربتي و أشارك معلومات العيادة اللي تعاملت معاها في أسفل المدونه.
لسنتين كنت أسوي تبييض أسنان بتقنية الزووم في عيادات كثيرة و بتكلفه كبيره تصل إلى ١٥٠٠ ريال سعودي.
بعدها أنتقلت لـ اللصقات. كانت نتيجه مرضيه إلى حدٍ ما، لكن ماكان تبييضها كفايه ورجعت للتبييض في العياده.
هذي السنه قررت أغير عيادة الأسنان وتعاملت مع دكتور حول تجربتي مع الأسنان إلى شيء رائع وصارت مواعيد الأسنان محببه جداً لقلبي.
بعد ماشيكت أسناني لنهاية العام، أستعداد للنزول لـ السعودية عملت حشوه -للأسف- و طلبت التبييض من الدكتور
لكن أقترح علي القوالب المنزليه اللي كنت أسمع عنها لكن ماعندي أي خلفيه عن الموضوع.
هي عباره عن قالب مرنه لأسنانك، ياخذون القياسات في العياده ويجهزون القالب
ويعطونك مع القالب ٣ أبر تحتوي على جل مادة التبييض، كل ليله قبل النوم تجهزون القوالب بحيث تحطون كمية بسيطه من الجل و تلبسون القوالب لمدة ساعه.
تبان النتيجه بعد ٧ أيام إلى أسبوعين بحيث توصل لأقصى درجة تبييض وطبعاً هذا يعتمد على درجة صفار أسنانك
توقفون الأستعمال وترجعون تستخدمونها كل ماحبيتوا تبيضون الأسنان أكثر أو إذا عندكم مناسبة قريبة.
مميزات القوالب كثيرة، منها:
- القوالب ثابته عندك وتقدرون تستخدمونها لسنوات، كل اللي تحتاجونه هو الجل بعد ٦ شهور، إذا خلص من عندك.
- النتيجه رائعه زي التبييض في العياده لكن ياخذ وقت حتى يبان مثلاً أسبوعين بعكس العياده اللي في لحظتها تبان النتيجه.
- القوالب آمنه أكثر ولاتسبب تحسس للأسنان و اللثه بالشكل المتعارف عليه مع تبييض الأسنان لأن مافيه أشعاعات متركزه
ولا مواد كيميائيه تنحط على الأسنان في البدايه عشان يعطي نتيجه
- أنتم تتحكمون بدرجة التبييض و مقداره. مثلاً تستمرون على أستخدام القوالب لحد ماتلاقون النتيجه اللي ترضيكم
- تقدرون تستخدمونها بأي وقت وأي مكان وكآنها عيادتكم الشخصيه المتنقله.
يفضل تبدأون التبييض بعد ماتعالجون أسنانكم كامل و الأكيد بعد التنظيف.
بعد ما عالجت أسناني حجزت موعد لأخذ القياسات للقوالب. الدكتور قبل يبدأ شرح لي العمليه كامله
و جاوب على كل أستفساراتي و تساؤلاتي عنها.
الموعد الثاني مريت و أخذت القوالب من عند الأستقبال معاها ورقة أرشادات. نفس اللي ذكرها لي الدكتور
وبديت فعلاً بالأستخدام و النتيجه أكثر من رائعه و مبهرة.
أرشادات لأستخدام القوالب:
- يفضل تستعملون القوالب في الليل عشان تخلصون وتنامون بدون أكل ولا شرب سوائل حتى تاخذ نتيجه أكثر طوال الليل.
- يمنع تفريش الأسنان قبل وضع القوالب. (كثير يعتقدون أنهم يحتاجون ينظفون الأسنان عشان تعطي نتيجه لما يستخدمون التبييض و في الحقيقه هذا يحد من النتيجة المطلوبه)
اللي تحتاجونه تمسحون أسنانكم بالمنديل وتبعدون عنها الشوائب الكبيره فقط.
- القوالب توضع لمدة ٦٠ دقيقه. ممكن ٤٥ دقيقه لو ماتحملتم القوالب في الفم.
- التفريش يكون بعد التبييض لو حبيتم (في حال حسيتوا أن الماده مضايقتكم طعمها) غير كذا تكتفون بالمسح بالمنديل وتفرشون يوم ثاني.
- يفضل أنكم تلتزمون بعدم شرب سوائل أو أكل أغذيه بصبغات عشان ما تلقطها أسنانكم. السوائل بالمزاز كخيار.
- في حال حطيتوا الجل ولبستوا القوالب وطلع جزء من الجل على اللثه، أمسحوا الزائد بمنديل بشكل لطيف (عشان يمنع تحسس اللثه)
- الجل يحفظ في الثلاجه و تطلعونه قبل الأستعمال بنصف ساعه حتى ياخذ حرارة الغرفه
- القوالب ماتغسل بماء دافي أو حار أبداً (لأنها ممكن تميع) . تغسل بالماء البارد فقط.
شخصياً كنت أحط القوالب للفكين بنفس الوقت لكن كان مؤلم لفكي و متعب جداً.
لذا صرت أحط قالب الفك العلوي ساعه و الفك السفلي ساعه أترك مابينهم خمس دقايق أريح فمي:)
المعلومه في الأسفل تفيد مبتعثين ملبورن - أستراليا
أيده خفيفه و فاهم جداً و يقدم النصيحه حتى لو كانت على حساب الربح المادي.
التكلفه كانت ب ٣٠٠ دولار لكن أخذتهم وقت العرض ب ٢٥٠ دولار أعتقد.
هذا ختام التدوينه، شكراً للقراءه.
تعليقات
إرسال تعليق