5 أيام في مدينة أديلايد الأسترالية Australia | Adelaide

السلام عليكم و رحمة الله و بركاته

تدوينة اليوم عن مدينة أستراليه جميله، صغيره لكن حسيت فيها بالحميميه. مدينة أديلايد في جنوب القاره الأسترالية

مدينة نظيفة، غير مزدحمة، منظمة و شعبها لطيف جداً. رتم الحياة اليوميه خفيف و لطيف. جوها متقلب لكن أدفى من مدينة ملبورن حتى في وقت الشتاء.

الأسعار لأماكن السياحة معقوله (كثير من الأماكن عامه لذا ماكان فيه مصاريف كثيره) الأكل أرخص مقارنة بملبورن.

المدينه أجمل لما تقطعونها بالمشي بدون أستخدام وسائل المواصلات، راح تستمتعون بتفاصيلها.

برضو المدينه جدرانها مليانه جرافتي، متعه بصريه وجميلة للتصوير الشخصي. راح تصادفون كثير من شعب أستراليا الأصلي، نسبتهم كبيره لكن للأسف بحالة سيئه.

تحتاجون سياره في بعض الأماكن أو ممكن أوبر، المواصلات العامه توصل لكل مكان لكن تاخذ وقت أطول وتوقيتها ممكن مايتناسب مع جدولكم.

مدة الرحلة ٥ أيام، كانت كفاية لزيارة أهم معالم المدينه. كثير من القرى حول المدينه عليها تقييمات جميله من السياح لكن زياتها ماكان مناسب مع جدول الرحلة.

المطار مرتب، نظيف، صغير لكن ممتاز. خدمات التاكسي، أوبر متوفره. ماشيكت على Skybus لأن الفندق قريب.

زرت المدينه مع صديقة تدرس هناك، (رزان الدوسري، مؤلفة كتاب بحرٌ من مطر و مؤسسة جمعية واصل التطوعيه في أديلايد)

كانت الزياره مثريه معاها وممتعه و الكثير من الضحك، الأيجابيه و الأهم أنها تعرف المدينه لذا ماكان عندنا وقت ضايع.

أيضاً كانت فرصه ألتقيت مع بنات من المدينه و هذا أضاف متعه للأنشطه اللي سويناها.

السكن في فندق Hilton Adelaide. الفندق كان ممتاز جداً بالخدمه، مريح، في وسط المدينه لذا التنقل ماكان عائق أبداً و كثير من الأنشطه مشيت لها ما أحتجت للترام، قطار أو غيره.

الفطور في الفندق جيد جداً، المطعم وسط، يمكن لأن المينيو ماكان فيه نوعي المفضل من الطعام.

مقابل الفندق مباشرة خط الترام الوحيد في المدينه (أعتقد). ممتاز جداً للتنقلات خارج السيتي. جوانب الفندق الحي الصيني، شارع مطاعم رئيسي مفتوحه إلى وقت متأخر بالليل و كولز.

(في الصوره، محطة ترام رئيسية، عند بوابة الفندق تماماً)

أهم نقطه عندي بالسكن هو أنه يكون بوسط المدينه اللي أسافرها وقريب من المواصلات

صح بيكون مكلف نوعاً ما لكن بيوفر علي قيمة المواصلات كامله طوال الرحله، في حال أستخدمت المواصلات العامه بيكون بسيط

أيضاً كسياح ماراح نرجع البيت من ست المغرب، لذا في حال العوده بعد الساعه ١٠بالليل مافيه خوف أبداً.

Glenelg beach

وصلت العصر ريحت وثم أنطلقنا إلى البحر، توصلون للبحر بالترام ياخذ حول ٤٠ دقيقه عن منطقة السيتي لكن يمر بأشياء كثيره حلوه تقدرون تنزلون تتمشون وترجعون ثاني للترام تكملون رحلتكم.

منطقة قلينيلق جميله جداً كأنها الكورنيش بالسعوديه، مسطحات خضراء، بعدين البحر ممكن النزول و الجلوس عنده، نظيف و منطقه حيويه جداً جداً

حولها مطاعم، مقاهي إلى وقت متأخر بالليل، كثير من عروض الشوارع مثل السحر، الغناء و غيره

على الأمتداد فيه منطقة اليخوت البحريه و كنت أتمنى أطلع في رحله لكن للأسف كانت الحجوزات فل طوال الشهر

هذي اليخوت بعضها عباره عن رحلات بحريه لمدة ٣ إلى أربع ساعات، فيه منها رحلات غداد، أو رحلات شاي (حلويات وشاي)

طبعاً راح تستمتعون بالأماكن اللي يمرها اليخت بالأضافه إلى أن بعضهم مدتها ٥ ساعات وعباره عن رحلات غوص.

ماشيكت إلا قبل الرحله بأسبوع ومالقيت حجز لكن حبيت نمر عليها ونشوف المنطقه

ولأن المنطقه بحريه فأمتداد اليخوت كله مطاعم بحريه ريحتها تصك الراس بس تعجبكم.
فيه مسار جميل وواسع للمشي حتى توصل لمنطقه بعيده بوسط المحيط، جميل جداً لكن رحناه بالمسا فماطولنا بالمشي إلى داخل

الجو كان يرد الروح شيء جميل جداً جداً جداً، أيقنت أن نص المتعه في السفر هو الأجواء الجميله، لذا أختاروا التوقيت بعناية.

Cleland Wildlife Park

أنا ضد حدائق الحيوانات و حبسهم في أقفاص أو السرك اللي فيه حيوانات. لكن اللي خلاني أزور الحديقه

لأنه عباره عن غابه، الحيوانات مفلوته براحتها وتعيش حياتها الطبيعيه بدون قيود، أزعاج أو تعذيب

الحديقه تحتاج أقل شيء ٣ ساعات، ولو معاكم أطفال تحتاجون أكثر، مافيه سيارات لذا لازم تمشون وإذا تعبتم ممكن تجلسون في الجلسات

إذا تبغون تمسكون الكوالا وتصورون معاه تحتاجون تروحون بدري قبل الساعه ٣ عصراً لأنهم بعد كذا يدخلونهم للنوم وكلنا نعرف أنه ينام أكثر من ١٢ ساعه لذا يستغلون أوقات صحيانهم للزوار

قدرنا ندخل جهة الكوالا لكن صورنا معاه بدون مانحمله لأن على كلام الموظفه أنه نعسان لذا ماينفع نشيله.

في الغابه كل الحيوانات الأستراليه الأليفه و الخطره منها، حتى شفت الدانجو لأول مره في حياتي، أكلنا الكناغر لمدة ساعه و شفت النعامه تركض ورا الصينيين بعد ماطفشوها.

كانت التجربه مدهشه وممتعه جداً. قدرت أتفاعل مع الحيونات و أتعرف عليها و أشوف حياتها بشكل أقرب.

أول ماتروحون الحديقه عن منطقة الدخول أشتروا طعام للحيوانات وتذكارات لو تبغون عشان ماترجعون لأن مكتب الدخول يقفل ويتركون الغابه مفتوحه ٢٤ ساعه لذا مايهم متى تطلعون منها

لكن تأكدوا أنكم ماتبغون تضلون في الغابه بعد الظلام لأنها من دون أنارات ووجودكم مع الحيوانات موحش. حنا طلعنا متأخر وكان معانا قروب هندي فقط، المنطقه كانت فاضيه.

الغابه أو المتنزه يبعد حوالي ٣٠ إلى ٤٠ دقيقه بالسياره لكن فيه باص لذا شيكوا على التوقيت أن كنتم بتتنقلون بالباص.

Mount lofty + summit

منطقه جبليه فيها شلالات ومسار للهايكنج وثم تطلعون مسافة ١٠ دقايق بالسياره للمناره ومنظر من أعلى أدليد

المنطقه جميله جداً، الشلال كان غزير، فيها مطعم مطل وهو المطعم الوحيد في المنطقه. أستمتعت كثير بالزياره لكن لأني ماكنت عارفه بالمكان مالبست شيء مناسب للمشي وتعبت نوعاً ما. لكن ١٠/١٠ للي يحب هذي الأجواء

ممكن تاخذون قهوتكم وحلاكم، فيه جلسات فوق بالجبل عند الشلال، تجلسون وتستمتعون بالمنظر والسياح رايحين جايين عليكم. 

الصور ماتعطي المكان حقه لكن كان يوم لاينسى، حسيت بالحياه مع الجو الجميل و المناظر الحلوه.

ولأن وصلنا متأخر كنا نبغى نشوف الغروب، ما أمدانا ندخل المناره ونطلعها لفوق كانت مسكره

المنطقه كلها جلسات وفيها كافيه يعني مناسبه لو حابين تجلسون قبل الغروب.

لكم تتخيلون الجموع الغفيره اللي بالصوره كانت موجوده عشان تشوف منظر الغروب الآخاذ، موجوده الصور على حسابي في الأنستقرام.

Hahndorf

القريه الألمانيه، إذا تروحون أديلايد وماتروحونها فسفرتكم ناقصه. من أجمل الأشياء اللي زرتها

مدينه كامله ألمانيه ولها تاريخ، مطاعم ومشغولات ومحلات خاصه كلها ألمانيه، راح تعيشون الأجواء الألمانيه بتفاصيلها

رحناها بالليل وكان برد شديد وقتها وشيء غريب عشان بالنهار كان حر، ماكنا متحضرين للتغيير المفاجئ

تمشينا فيها على السريع وجلسنا في أحد مطاعمها الشهيرة.

طوال ما أنتم تمشون من مدخل المدينه إلى مكانكم المنشود وهو فيه تماثيل وأعلام وشاعارات ألمانيه تحسسكم بأجواء مختلفه،

وعلى ذمة الراوي أن ينزل عندهم ثلج بهالمنطقه بعد:) المدينه من أولها لأخرها مزينه بالأنارات و الأشجار.

المدينه يوصلها باص كل نصف ساعه أعتقد لكن أخدنا اوبر، أختاروا وسيلة المواصلات اللي تناسبكم. 

Botanic gardens

و في أي زياره لأي مدينه أحب أروح البوتانيكال قادرن أو الحدائق الملكيه، أحبها جداً، أحب فكرتها، أحب أجوائها

و الجلوس فيها مريح للأعصاب وعباره عن علاج نفسي بسيط و رخيص هههه

ممكن تحملون معاكم كشتتكم لأن المكان مناسب جداً وفيه كثير ناس تحمل كشتتها معاها، راح تستمتعون بالتمشيه وممكن تجلسون تاخذون هواء نظيف بعد العصريه.

فيها متحف و بيت زجاجي، حلو لو عندكم أطفال راح يستمتعون، بيومها شفت رحله مدرسيه وقد ايش الأطفال مبسوطين

فيه مشتل برضو لو حابين تشترون بذور أو نباتات.

Chinese town

كأي مدينه أستراليه لازم الحي الصيني يكون بالوسط ومانقدر نتغافل عن زيارته، زرته بشكل بسيط جداً في الصباح

٩٠٪ من المحلات كانت مقفله لكن الزياره كانت بدافع الفضول مو لغرض الشراء أو الأكل من مطاعمهم

الحي صغير جداً مقارنة بالحي الصيني في سيدني أو ملبورن.

Adelaide river

المنطقه النهريه في المدينه جميلة جداً، رائعه للمشي، لرحلات عائليه خفيفه (مافيها شوايات:( ) لكن جميله جداً للجلسات

على جانب النهرين فيه مطاعم وكافيهات بأطلالات حلوه، فيها قوارب صغيره للتأجير، أخذت واحد مع صديقتي أستمتعنا جداً بس كان متعب نوعاً ما.

وفيه القوارب الكبيره للرحلات الجماعيه في النهر و التعريف بالمدينه.

أنصح اللي يزور أديلايد لا يتردد بالغدا على النهر، أجواء جميله ولطيفه و منطقه نظيفه جداً وهادئه.

Carrick hill

هذا المنزل الأثري لأحد أشهر و أنبل العائلات في القرن الماضي، العائله أستقرت في أديلايد لأسباب كثيره منها أن بعد سفر طويل من بريطانيا بالسفن و الباخرات، وجدوا أن أديلايد أقرب منطقه لهم (يكفيهم عناء السفر)

القصر جميل جداً، ساحر و كل ركن فيه يحكي تاريخ عريق وقصه جميلة 

داخل القصر فيه أثاث العائله + مكتبة العائله بكتبها + كافيه لطيف جداً يطل على حديقة القصر و غرفة تسوق لبعض التذكارات 

( أشتريت حامل نظارات مصنوع من خشب القصر نفسه، تقدرون تستفسرون عن قطع تذكاريه تنتمي للبيت بالدرجه الأولى)

المكان يبعد عن السيتي حوالي ٤٠ دقيقه لذا أحملوا معاكم أكلكم في السياره لأن ساحة القصر تعتبر مكان للتنزه لكثير من العوائل 

بعضهم مايدخل القصر ويكتفي بالجلسه في ساحات القصر والأستمتاع بالأجواء الجميله 

North terrace

منطقه جميله للتنزه حول المدينه، مطاعم، كافيهات، محلات تسوق كله في حدود السيتي 

جميل جداً الواحد يتمشى في حدود السيتي ويستمتع بكل شيء (حاولوا تتجاهلون السيارات، الترامات وتاخذونها نزهه على الأقدام) 

أستغلوا الوقت بأنكمم تتغدون على النهر أو في مطعم الطباخ العالمي الشهير جيمي أوليفر و أستمتعوا بوصفاته الخاصه 

 Hallett cove

أيش ممكن أقول عن هذي المنطقه الساحره؟ مافيه تعبير يوصف جمال المكان. 

المنطقه تبعد حول ٣٠ إلى ٤٠ دقيقه بالمواصلات العامه من وسط المدينه. 

هي منطقه ساحليه جميله جداً، نظيفه جداً، هادئه جداً تستاهل الزياره بكل تأكيد.

أعتبرها مكان أساسي للي يبغى يشوف جمال أديلايد. 

فيها البحر وفيه كافيه وحيد بأطلاله رائعه لكن بيكون أجمل لو شويتوا في المنطقه المخصصه على المحيط 

وأيضاً فيها جبل للتسلق وفيه كل القصص التاريخيه وراء كل صخره ومعلم ومعلومات رائعه عن الحياة البحريه

أحس مهما تكلمت ممكن أظلم المكان لذا يفضل تبحثون كثير وترتبون جدول الرحله قبل تتوجهون للمنطقه. 

 Tea tree plaza

هو أحد أهم و أكبر المولات في المدينه. حبيت كثير الترتيب، الديكور و التنوع في كل شيء من مطاعم أو أسواق 

دخلنا السينما شفنا فيلم بعدها حلينا في كافيه رائع ولذيذ جداً، للأسف ما أتذكر الأسم حالياً 

الوصول للمول بالقطار ويوصل للبوابه. مايضيع ولا فيه حوسه. إذا حابين تشوفون الأسواق ولا تشوفوت شيء مختلف يستاهل الزياره. 

 Ayers house

أحد المنازل اللي كان يملكها أحد التجار البريطانيين اللي هاجروا ونقلوا إلى أستراليا بعد أكتشافها بحث عن الكنوز 

المنزل تحول إلى Nurses accommodation بعد وفاة أصحابه ومن بعدها تحول لمزار للسياح وصالة الرقص في المنزل تقفلت لأسباب حكوميه (مجهوله) صالة الرقص تقدر تشوفها من برا من الزجاج شيء جميل جداً زي الأفلام 

كانت الساحه مقصد للتجار و أصحاب الأموال ويحيون حفلاتهم بأستمرار لكن ما أعرب سبب الأقفال 

المنزل محتفظين فيه ب٦٠٪ من ممتلكاته و البعض صار له تجديد. دخول المنزل ب ١٠$ اعتقد للطلاب 

وفيه مرشد سياحي وكتيب يحكي القصه للبيت والفترات اللي مر فيها. البيت عادي ممكن مايجذب البعض لكن أنا حبيت أزوره لأنه يعتبر معلم تاريخي بالمدينه. 

Walk around the city + Good bye Adelaide

في الختام أقدر أقول أن المدينه أخذت قلبي و حبيتها بكل تفاصيلها. ممكن ماتناسب للي يفكر يستقر فيها لفتره طويله

لأن البعض يبغى ترفيه و أماكن جديده وغيره طوال العام لكن بالتأكيد مدينه جميله تستاهل الزياره 

يفضل تروحون ،عندكم جدول معين لأن هذا بيحفظ لكم الوقت وتقدرون تكتشفون وتتعرفون على المدينه بشكل أكبر 

ولو تعرفون أحد من المدينه خلوه يعلمكم عن بعض الأماكن لأن بالأنترنت راح تلقون المراكز المهمه للسياح فقط في حين هناك تفاصيل كثيره جميله لكن مو معروفه. 

تجربتي في المدينه ككل ١٠/١٠. الحمدلله كانت تجربه ممتعه. بالرغم من أن كثير قال لي لاتروحين لأن المدينه ماتستاهل:(

راح أترككم بصور من المدينه. و بالنهاية أتمنى أنكم أستمتعتم بالقراءه. والتدوينه القادمه ستكون عن مدينه أستراليه ممله جداً :).